Theatro (tiyatro)

Tsi Tsilimuntrus to miroloyi

Meros (bolum) 1.

(O Xaxutis e xathen ce esoreftan uli i xoroti s'ospitin'at ce i yineci so cefalinat epan me tin yinekanat tin Tsilimuntru entama mirologunatona)

I Tsilimuntru mirologay:
- Ela ela e mana'm oy c'ela ela e ciri'm oy
- Egho har te n'eftego, exasa ton Xaxuti'm oy
- Ego xar manaxesa c'iciliya'm so miti'm en
- Nto dromo n'epero ego, athigo ton Xaxuti'm oy
- E Xaxuuuut, e Mantzeee, E skototooo; p'efices to pici's c'eshi paaas?
- Ox mana'm...
- Kratisete me eshi royizo!

(E kratesenatena i Gorgolidika ce etrukulisenatena eligo)

I Gorgolidika:
- Epats ya sta!
- Krateson ta dekres!
- Ce nto, uli na xamest!
- Ego an emun, manaxo yat' astoshinat n'eklega...

(Omon to ipen ayets i Gorgolidika, i Tsilimuntru eficen to klapsimo ya ta gardelenates ce arnashepsen ya t'astoshi tu Xahxut)

i Tsilimuntru:
- Ela ela e Mantze'm oy c'ela ela e skototo'm
- Emis ecin tin dulia, t'oran en t' uc epikam oy
- Esku ayte as pame ce, dos me to maremenos oy
- Isa lego akuso me, ego uce na xoleskom oy

(O Xaxutis ontan exathen, i psolinat etone eskomeno ce efanerutune as'empali nte tiliksan epane nat. Omon nto iden t'antrugates t'eskomeno i Tsilimuntru alo uc eporesen stahine. Epiyen e gavrosen s'antrugates tin psoli ce ekuyisen)

I Tsilimuntru:
- E Mnatzeee'm; a toson trano etone ce ha tosa xrone oden apemen ekrivesaaa?

(Omon nto iden oti i Gorgolidika stravoteriyetena, eklosten s'ecinena mer ce ipenatena:)

I Tsilimuntru:
- Uuux, epats; ya ter poson en, tin vuram pa egomosen.

(I Gorgolidika kratiy to sheri tsi Tsilimuntrus ce sure s'ecinena mer ce ley:)

I Gorgolidika:
- Epats y'epar to sheris ap'ato as astoshi.
- Ya mi pas eci, uc entrepese?
- Entropi en!
- Istaro ato nt'elepis nto en?
- Ontan erxutun s'emen n'elepes poso eton!
- Omon kutali, sa gonata'nat ekativenen.

(Omon t'ekusen i Tsilimuntru asin Gorgolidika ata nt'epinane ep' ecinena krifas, epiren apsimo ce arnashepsen na kuyiz)

I Tsilimuntru:
- Uhhhh, alo nt' uce n'akugooo...
- E Mantzeeee, e skototoooo...
- Se mena maremeno ce s'avutena eskotoooo...
- Sa stashomena ta studes na shezoooo...

(I Gorgolidika omon te teresen i Tsilimuntru egricesen ato nt'efiyen aso stomanates, eklosten ipen'atena)

I Gorgolidika:
- ....

T'alo na permenite :)

Vahit Tursun