As arnashevo asi yinecus:
Olon empro to proyi (sabahtan) eskuntane ce kativenun so mantri. Fayizun ce almegun t'ayelade. Istaro egvenune epan eftene fayi ya na fayizun ce potizun ta gardele ce ton antratuna. Istaro forizun ta gardele ce apoligun s'okuli. O siras erte ya aletera dulias. An en kalokeri (yazus) egvenun so ceyrokoma, pane s'oros ya ta xortare. Terune ce evriskun kaynen ya na pane sa xortare entama. Enuntane triya tesera nifade ce ineci ce entama pane sa xortare. Avuto i dulia eper poli xrono. Kloskuntan opis arga ce ganaxtemeni. Kal fayizun ce potizun ta za ce thenun epan to fayi. Erxuntan ta gardele as'okuli ya na trogune. Istaro erte ce o antras ya na troy. Ula ta dulias eksu ontan ciruntane, arnashevun apes s'ospiti ya to shkevoplisimo. Plinun ta shkeve ce an evriskun eligo xrono eperun tin plecinatuna ce kaxuntan ce plekun.

Ta za exun polla dulias. Fayisimo potisimo ce istaro strosimo.
To strosimo pal thel xise. Ta xise eftenata asa ksera fila nto roizune asa debtra. Sorevunata as'oros me ta trana ta kofine ce kovalun ce stivazunata so komi. Istaro na struntane sa za epuka c'epeci ta za na shezun ce katurune epan. istaro avuta ta kopre na kovaliskuntan olon empro so kopronari ce istaro ep'eyceka so xorafi. So xorafi ta kopre thelun strosimo.

Ontan erte to theros alo polla ganaxtune asa dulias. Pane sa xorafe therizun ecina nt'espiran. Ta tsupade exorizun asa tsupadoxorta ce kovalunata s'ospiti. Istaro eftene mikro ergatiya ya na apotrifilizun ta tsupade. Alo dulia en nto na sorevun ce xaxalizun ta xartse asa fasulikas ce stivazunata omorfa s'enan ceka. Istaro na xaxalizun ce apokocizun ta fasulikas. Na sorefkuntan ta mila, ta kocimpela, na tinaxtune ta karide. Polla dulias...

Ontan shimaz i duliyanatuna alo zori en. Prin shoniz kala kala n'eftene ula ta ksila nto na cegun. Pane koftune c'eftene variya gomare asa ksila ce fortota ferunata s'ospiti. Istaro koftun ce eftenata peskoksila ce stivazunata sa xayete ce su spiti to xali ya na mi vrexuntane.

Ontan shoniz eporun ce evriskun eligo xrono c'ecino pal u kaxuntan. Olon eligo dulia en to pleksimo. Me t'ecino devazun tin imera sa t'eftene parakathi.

Olon omorfo ce olon zori en t'egvinimo son parxari. Ulin sorevun ta seyatatuna ce fortuntane fagopote ce egvenun son parxari. Son parxari ta za afinune s'enan tsopano nto plenetona to xorio. Eci pal ta dulias u ciruntane. Oti epinan so xorio eftene ce eci. Istaro apo tria minas, prin arnashev o shimos kloskuntan opis so xorio.