Aso xoriyomuna ce aso numuna eshi xantane polla. Olon empro eshi xate i glossamuna. Os to xar exasame ena suri leksis (kelimedes) ama adaceka na grafume nte xasame asa sheyata ce esh'anespalume ta onematatuna.

1. Zigoyira
Etone enan stilari nte kratenen anamesa so tavani ce so patoma. Etripenan to tavani ce to patoma ce evalenan eci ena stilari, legno omon martaci ce so katu to meros asa kladia tu liftokari epinan ena loyirika ce ekarfonana epan so stilari. Apes sin loyirika eraftan ce ekremanan ena enkuni. Istaro evalen eci ta mikra ta gardele ce ayets epinan ta duliyasatuna ecini nto ixan mikro gardeli ce uc ixan kaynen vayila. I zigoyira osimero exathen ce kaynis asi mikrus uc ekser nto en.

2. Volonothika
I volonothika etone ena mikro trigono empalopo pu apesmerika ishen pampaci ce etone skepazmeno met enan dermatino (meshini) ap'eksu. Sin volonothika evalenane palea mikra trana volone ce mavro aspro rama. Ato ekovalenana entamatuna uli i yineci. Ixana entama ya n'eraftan ta foresiyasatuna ontan etserigusan eksu aso spiti. Edenana aso rafidinethe so mesorafido ce ayets uce fanerutune. Osimero eligi ine ecini nto akome kovaluna ce polli ine nt'uc ekseruna.

3. Gushaxi
To gushaxi etone nte forenane katu aso tolayluxi ce ishen apo pis kursiya. Osimero u foriyete ce kaynis pa uc agoraze.

4. Kopali
To kopali etone ena ksilo to opio etone pelecigmeno ce plati ap'empro ce legno omon pasi sturaci ap'opis me to opio eplinan ta foresias s'ormiya ce sa potame.

5. Shafokopalo
To shafokopalo etone ena sparaxteri to opio eduleven me to nero. Ishen emprothe enan teneke. To nero erxutun eroizen son teneke apes ce ontan egomutune eroizen katu ce kativazen to kopali ce entonena s'alo ton teneke. Ayets egvalenen lalia ce afoverizen ta muxtera ce ton arko ya na min trogune ta spermena nto ixane sa xorafe.

C'ala polla exasame ce eshi xanume ama xar atoson erthane so num ce atoson egrapsa. Opios esh so nunat kati aletero as grafimasina.