I Fatime: Epats antras p'en?

I Mine: Kapu makra epiyen ya ti duliya. Enespala t'onema tu topu nte piyen. 

I Fatime: Epats pote epiyen?

I Mine: Pola uc en t'epiyen, prin dio minas ekseven aso xorio.

I Fatime: To duliya eftey ekseris?

I Mine: Epats ego nte? Ipersi emathen to xtisimo ason adelfonat ce ifetos n'extizen. Xar nt' eftey uc eksero.

I Fatime: Apoliy tipo? 

I Mine: Epats nto n'apoliy? Xar pal epiyen. Ton paranat pal u kratiy, oti evrishk, alife ada achi. Ula kopreyete ce opis tipo uc afin. Ontan kloskete kati fer entama ce ecino pal diguma secina te xartsepsam. Xnudi t'enan t'alo epan u porum na thenum. Ayets, me to zori teriskumes.

I Fatime: Epats, i petheras ce o petheros lagi ine?

I Mine: I petheram lagesa na en, omon stilari ortha stec. Kahesimo nto en uc esker. Emena pal uc afin na kaxome. Xatara egval tin pshi'm. O petherom kalos en. Ecinona pola uc elepo. Tin imera egven ce to vradi kloshkete. To fayinat an dis, i laliyanat uc egven. Ecinos pal an uc eton, me tin petheram uc eporena n'esteka. Ecinos omon t'erte so spiti, eligo koft tin laliyanates. Ecinos onta pay, to stomanates alo u klin. Olon tin imera ververiz.

I Fatime: I adelfis nt'eyenton, entrisen?

I Mine: Ne, ecine polla eyenton t'entrisen, xar akusesa?

I Fatime: Ne xar akuga ap'esen.

I Mine: Oxooox, ecine dio xrone en t'entrisen.

I Fatime: Tina esh?

I Mine: Tou Ispir to yo esh, ton mikrotero.

I Fatime: Eh, epats ecinos pote eyenton ha toson? Akom opsezno gardeli eton! Mikro pedi etone ontan idatona.

I Mine: Epats nto les? Ecinos asin adelfim dio xrone alo traniteros en. Esi enespalesatona!

I Fatime: Ne isa les. Polla xrone eyentan t' uc idatona. Xar p'en? Ada me en?

I Mine: Epigan sin Trapezunta. Epiren ce ti yinekanat entama. Ekovalesan to spiti. Eyceka kaxuntan.

I Fatime: Exun t'ecinetero spiti?

I Mine: Piyos na diyetinus to spiti? Son kira kaxuntan. Ecinos pal dulev senan fabrika ce ayets teriskuntan. Ecinos ton paranat kratiy, uc en omon temo ton koprogula. O koprogulas oti evrisk troye. Omon kosara oks'opis axtarev. Oson ipatona, oson etavisatona, uc ekuse me. O nus'at u koft istaro nto na inumest. Ayets devaz ta imeras. As terume to na koproguleyete ontan yeray. T'askemo en, emena pal surtariz apo pisanat.

I Fatime: Ts'adelfis antras en omorfos? Ego ontan idatona mikros etone ce ashkemos c'etone.

I Mine: Meee, trano omorfos.
Epats so xoriyomuna pios en omorfos? Uli omon mustriya, pixlomiti. Ton omorfo pal piyos n'afini mas.
Hayets lego ama, to lego mi teris! Xa toson pal ashkemos uc en.

I Fatime: Ne, isa les ama i adelfis pal uc etone pola omorfesa an legum to isa.

I Mine: Ap' ecinona omorfiteresa en.

I Fatime: Agapeta me, surta me, laga piyen?
Epicete dughuni?

I Mine: Fiyeta epiyen. An entrizen omorfa uce ne lalena se?

I Fatime: Ayets erotesa.

I Mine: Eshite za:

I Fatime: Ne exume dio.

I Mine: Nto ine, almexkuntan?

I Fatime: To ena almeyete ce to alo ekopsen. To sheytanofago pola glici uc edoce mas.
Esis posa eshite?

I Mine: Emis triya exume. As e'metera pa to ena almeyete ce to ena en muskari. To alo trano en. Na puluma. As terume pios n'agoraze.

I Fatime: Me poso na dite?

I Mine: Uc eksero, o petherom esker. Ecinos tarayete sa aytika duliyas.

I Fatime: Ulla ne pulenam ce ne glitonam asa dulias. Ula ta dulias ya t'ata efteme. Eksenkan tin pshimuna. Ta koprofaye tipo udigune mas pa.

I Mine: Epats ode les ayets? Ata pal an c'ixame to kopre n'etrogam. Nte ne pinam? Ta gaydure nte exum so spiti n'erezenam pote na ferune mas ce na trogum?
Ta za pal kati digune mas ce devazum tin imera. Tiri, vutero, glici, gala, tani, ula avuta an c'esan nte ne pinam? Ta za ne pulenam, glitonam asa dulias? Pal ne dulevam. Nto ne kaftam so spiti? Pios ne pinen to fayi ce pios n'eplinen ta skeve?

I Fatime: Eh, nte n'eftem, ada so xoriyo yineci eyenethame...

Vahit TURSUN