Eykiti imeras.

Kserite laga epeynam so porpatema sa rashia epances?
Ontan inutune vradi, esorefkumunest sena ospiti ce exorevam me ta patside entama.
Tina egapenam, espinkam to sherinates, to daxtilonates ce ecine pal egricene oti egapenamatena.
O ilo prin elampen eskumunest pali me ta patside entama ce ekativename sa ksila, sa xortare. Emis uc e'peyname ya ti duliya, epeyname ya to porpatema. Elepane mas ce eriskusan. Ecini omon te fortusane ta gomare ce empenan so dromo emis pal apo pisanatuna epeyname. Esurenamatinus tragude. Parerizamatinus ce ivrizane mas. Emis eyelanam :)
Omon t'ekloskumunes so spitemuna, aso limo i ciliyamuna ekoligutune sin rashamuna. Etalevam so fanimo. Oti evriskam eton omnosto. Ekleftam krifas t'athogali t'epan. Pola omnosto etone. Istaro omon t'enoyizena i manamuna e t'avize mas, "Ontan tros t'athogali t'epan, opis to kopre na apomen" elegan i manadesmuna. Ama ontan e'druvanizan ce epinan to vutero pal, t'egvenen to tani pola omnosto etone. Epinam, epinam ce uc exortazam.
To tani ce to glici esane alo omnosta me to tsupaditiko to psomi. Ama to staritiko to psomi pal t'epinane so placi pola omnosto etone. So placi t'epsesane ta psomiya inusan omon kolothe. To staritiko etrogam me to tiri ce me to cayi prin egvine sin duliya.
To staritiko panta epeynen. Eperenam entama ce epeynam sin duliya pal. Ep'ecino epinam tin dapanamuna.
As'ola olon t'omorfo etone ontan enumunest ce epezame. To spiti e'nespalenam. Epezame kriftareya, nalpiri, matika, metakoskino ce aletera pola. Nt'uc epezame.

Eykiti imeras.

Xar?
Xar e'skorpigam o is ada ce o is aci. Eksevame si duliya t'arayema. Eci opu evram duliya e'pominam. E'xorigame as'emeterus ts'anthropus. Sa ksena ta mere palevume ya ne gvalume enan vuka psomi ya na trogume. Ato pal u ftan. Oniro elepis ya enan komati xoma, "enan lithari n'agorazo ce na en temo" les. Istaro les: "as exo enan ospiti ce asen enan tripi ya na valo eci to cefalim".
Traninun ce ta gardhele, ecini pal ulo xrima thelun. Na trogune, na forune. Istaro na pane s'okuli. Os na devenun ce tin universite xrima thelun.
Enan arapa les as ixa ya n'epeyna si duliyam. Os n'eftes ula avuta, teris enan imeran asprisan, eroisan ta maliyas. Teris son ayna ce uc egnorizis esi esen. Ograshevis na kloskese sa palea ama u poris. Ta xrone edevan. Xar ne peynes pal so xoriyos kaynis uc egnorizise. Ta mikra ta gardhele etraninan. To xoriyo alakse. An eshis xrimata uli legunese "nto kala erthes" ce omon t'egrikun uc eshis xrimata, kaynis son prosopos pal u teriy. To xoriyo manaxo uc alakse, ulos o dunyas alakse. T'omorfa ta patside pal uc arayevun omorfa pediya, terun tinos cepi en fuskomeno.
So spitis pas o ciris ce i manas pal tin cepis terune ya na legune se "e'pedim na eshis tin efcim" ce an c'eshis ulo arayevune kati n'evriskune ya na t'avizune ce na kataruntan.

Eykiti imeras.
Erxuntan so num ta paleya ce i paleyi.
Ulo temetero ti glosa esin tishenam. Kaynis aletero glossa uc eksernen. Op'eksernen pal ya s'okuli emathenenata ya ce egvenen aso xoriyo ce e'peynen sa makra ce emathenenata. Temetero i glossa nt'omorfo etone. Oti elegam eyelanam. T'emetero to milleti omon tiyatro etone. Esorefkumunes ce epinam parakathe. Katakremizam ton inan ce ton alon ce aso yelos e'krimunest. Me te'metero ti glossa i trani pal omon mikra gardhele esane.
To Kurani pal se'metero ti glosa emathizane mas. Op emathizane mas panta as emetero to xoriyo esane. Uli i xocades yerazmeni esane. Te'vriskan o xoces ya stravos n'etone ya kotsos ya ce palalos. Sin cami epeynam ya na mathename to Kurani ama emis epeynam ya to sevtaluxi. Par'erizam ton xoce ce eyelanam. Ecinos pal sa Romeyika etavize mas. O xoces panta ishen enan makri sturaci. Me t'ecino son toponat sa t'ekaxutun en tone mas. Emis e'zuglighumunes ada ce aci ya ne glitonam asa sturaceyasat. Omon nt'eskutune ortha emis egvenam eksu ce e' fevenam ce ecinos evoyizen: "oran an pleno sas na tsakono ta studesuna" eleyen, "n'enkalo ton cirisuna" evoyizen. Piyos ekuyen'atona?
Eksernam t'alo tin imera i xolinat ne devenen. An uc edevenen pal etiligumunes sin gulanat ce eparakalenamatona ya n'efinemasine.

Xar.
Xar ulin efikane te'metero ti glossa ce eklostane sin Turce. i paleyi pal me t'emetero ti glossa eften ta parakathetuna ama ta mikra ta gardhele Turce sin tishenune. Egrikun ce sin tishenune ta Romeyika ama ontan apomenun manaxi t'enan t'alo Turce sin tishenune.
Emis i trani pal terume to televizyoni ce arayevume programe ya na yelume. Oti programi ce n'evriskume, omon te yelanam u porum na yelume. Alo etone ontan elegam kati sa Romeyika ce alo en to legune sin Turce so televizyoni.

Gale gale i glosamuna eshi xate.

Pola fovume ce tharo me t'emas entama na guyeskete so xoma!!!

Vahit Tursun