Agapema (Sevtaluxi) T'olon omorfo to pragma (seyi) son kosmo (son dunya)... Laga agapume t'enan t'alo so xorio, nt'eftene t'aguropede ce ta patside? Sa palea ta xrone so xoriomuna polla exorevan ce epinane entama parakathe ce s'ecina ta parakathe elepan o is ton alon ce agapiskusane. Istaro entrizan ce yinecizan. Oson edevan ta xrone so xoriomuna to xorema enespalame. T'aguropede ce i aguri epeynan sin ksenitiya (so kurbeti) Ya t'ato polla parakathe uc intane. Ta parakathe as t'eliginan c'axen, to agapema pal ediskoleften (ezorlaneften). Tinos patsi puceka n'evriskes ce egapenes? I mana ce i adelfi eterenen ya t'aguropedi patsi. Istaro epeynan ethelenan tin patsi ce eperenana nife ce donana to pedituna. Olon polla eterenan an en kardeko ce eftey kala dulias. S'omorfantas kaynis polla uc eterenen. An eton kardeko eton kalo ce omorfo patsi. Se metera ta xrone eligo alakse. Ada aci pal evriskam, elepam t'enan t'alo. Ta patside eterenan pios epiren xorafi, topo eksu aso xorio ya n'eperenanatona. Ethelenan n'eglitonane asa dulias tu xoriu. Istaro ces eterenan pa pios espudasen (exuyepsen) ya n'eperunatona ce n'egvaletinus aso xorio. Oso n'elepam ena patsi apo makra ce apo konta ce egapenamatena, menixta epinam to agapema. Kaynis uc eporenen ne peynen eleyen tin patsi nt'egapay tipo. Uc eporenen pa ne sin tishene kaynis me ton alon. Ulo i dulia menixta inutune. Istaro ekugana i mana ce o ciri ce ayets i dulia ecirutune me to inecigma ce antrisimo.T'olon polla ta propleme namesa sin nife ce sin pethera egvenan. Eliga propleme egvenan namesa son antra ce sin yineka. I pethera ethelenen i nifenates na dulev omon gayderos. An c'etone kardekesa ethelenen n'afiskate i nifenates aso pedinates ya n'eperenen aletero nife nto na en kardekesa. Oso ce propleme n'egvenane so xorio, polla zore afiskatune kaynis se metero to xorio. T afizmena patside alo kaynis uc eperenen. Ta kamena ta patside entrizan me tsi tranus ogurus entama. Se metero to xorio nto na afiskase etone trano entropi ya ta nifade. Xar eligo exalerosan ama pal zori en to na agapiskuntan so xorio. Ontan elepunese kaxese me t'enan patsi, kloskuntan terune pios ise ce me tinos patsi kaxese ya na pane enkalunese. As t'enkalunese c'axen i patsi darkete ason cirinethe ce ton adelfonethe mereya. T'aguropedi kaynis tipo u ley. Oso devenun ta xrone i patsi ce to pedi alo polla erxuntan konta s'enan ceka ce eftene parakathe ce agapiskuntan alo omorfa. Egnoriz o enas ton alo alo kaliyo.

Apolisete enan omorfo E-karti otina agapate!